Answered Questions

لبيبا نطلب المساعدة بسؤال جداً مهم. لما يقولو ناس بسمني وناس بزيت، أيا وحدي لمنيحة؟

يا عامر كنك بتريد

تسمع رأيي بالتحديد

مين بسمنة ومين بزيت

ومين الأحسن بالتأكيد 

رح قلك فكرة ويا ريت

تحفظها براسك وتعيد

لولا من السمنة عبيت

جرة وبالمخزن خبيت

ورجعت عليها طليت

ومنها الريحة ما حبيت

بيبقى الزيت الشغل البيت

أحسن من سمنة تقليد

Answered: 2024-06-01

صرلنا ٨ سنين مجوزين. بالمطعم بيطلب سلطة و ع اساس دايت. انا بطلب أكل عل تقيل اتلذذ في. مننتهي آكل اكلاته ، و اكلاتي! و بطلب حلو ع اساس هو موقّف سكر، مننتهي آكل من حلوياتي كمان و بيأجل الدايت ل بكرا. موقف سكر بس مش شوكولا. موقف سكر بس مش بيبسي. موقف سكر بس مش رز بحليب! و بعدين؟ دايماً في  diet exceptions من صحني و اكلي. وينك يا لبيبة

اللي بدو يعمل ريجيم

تيحافظ عاأوزانو

بدو يكون عندو تنظيم

ويعرف يضبط ميزانو 

حتى لما برغبة وشوق

يطلّع عاأكلاتو

بدو يكون في عندو ذوق

وما ياكل فوق شبعاتو

عيب اللي بيخلص صحنو

يطلّع عصحون الناس

بيطلع مثل الكإنو

ما عندو نتفة إحساس

شو ما أكل مش ممنوع

بس بأكلو يكون عادل

لا بالأكل يكون مفجوع

بيبقى من التخمة موجوع

وما بيسوالو يحس بجوع

هيك بننصح للمجموع

لبيبة بتحكي مش عادل

Answered: 2024-06-18

أين تقع حدود الكرامة؟

الحدود خط بيفصل البلدان

    من فبركة إنسان علماني

هالخط يمكن عامدى الأزمان

    ما يضل نفس المطرح الآني 

والحس يللي بخاطر الإنسان

    البكون نبعو نبع وجداني

ما فيك تحددوا بأيا مكان

    ولا ترسموا بقاصي ولا داني

بس الكرامة ما لها عنوان

    وحدودها القلب العم يعاني

وبالقلب كل ما يكبر الإيمان

    كل ما الكرامة تصير عمراني

ويللي بإيمانو صبح عدمان

    عندو الكرامة حدودها فاني

حد الكرامة غامض البنيان

بيوسع بشخص وبيضيق بالثاني

الكرامة عز وشموخ وعنفوان

    انزرعت برغبة رب فوقاني

هيدي إرادة خالق الأكوان

    بتبقى مع الإنسان خلقاني

بتعيش وبتكبر مع الشجعان

   وبتموت مع الفّي عندو جباني

وموضوعنا تنلخصوا بإتقان

    حد الكرامة مش مع الإنسان

   حدود الكرامة أمر رباني

Answered: 2024-08-14

What is the difference between dibs and rib? And does dibs el banadoora exist? If yes can you get us some? e 

بين الدبس وبين الرِب

              فكار الشبيبة اْحتارو

ساعدني دخلك يا رَب

              حتى حِللو اْسرارو

نحن بنعرف إنو الدبس

              يا معمول من العنبات 

يا من خروّبات اليبس

              لمّا بيغلولو الورقات

هيذا هوّي الدبس وبس

              من دون كثرة خبريات

الرِب بطعمة مشهورة

              بدّو منك شغل كثير

لازم تعصر بَنْدورة

              وعالنار تخلّي العصير

ولمّا تشتد الصورة

              وتخّلِص شغلك بكير

بتبقى نفسك مسرورة

              مثل النايم عالحرير

لَو جينا تنلاقي حَل

              بيناتهم ما في صالح

كل واحد قاعد بمحل

              وبمحلّو بيبقى فالح

السكر بالدبس بينبل

              والحِلْو بطعمو ناجح

أما الرِب الخَرج الأكل

              الملح البِقَلبو جارح

ذات القيمة عند الكل

              ولو فَرّقت المطارح

الفرق البيناتهم بضل

              بين السكر والمالح

Answered: 2025-10-05

حلو طيب بيقولو رب رمان ولا دبس رمان؟

تيبطّل في عندك لبس

          والرمّان تصير تحب

إن كنّو حلو إسمو دبس

          ولو مالح بيصفّي رب

Answered: 2025-10-05

ما تعريف الشجاعة؟

الشجاعة بِكل أْصولها وفروعها

من قلب حر بينفجر ينبوعها

ولو جيت تاحتى الشجاعة تحدها

بتعجز لأنو بيغلبك موضوعها

الشجاعة بأيا شكل كانت بدها

قوّة وعزيمة تنوجد بضلوعها

مش بس من ضرب السيوف وحَدّْها

فيك الشجاعة تختصر مجموعها

حتى الكَرَم صوب العُلا بيشدها

وبيزيد مع النفس الكريمة ولوعها

وفيك المروءة من الشجاعة تعدها

وإغاثة الملهوف من مشروعها

ولولا القهر إيدو لصوبك مدها

صبرك شجاعة مثل نور شموعها

وكَتْم السر مثل الشجاعة وقدها

تما تسمح بإيد الغريبة وقوعها

ولولا الشجاعة عليك بسطت يدها

وحسّيتها مثل الشمس بطلوعها

بيكون حظك بالسما ومن بعدها

بتشوف إنو الفضائل بكل الدني

بتكون الشجاعة بالأصل مرجوعها

Answered: 2025-10-13